LIGJET E BIZNESIT
Nga Oljana Maloku
Kompanitë e sigurimeve sa vijnë e rrisin më shumë përgjegjshmërinë ndaj klientit duke shlyer në kohë detyrimet për dëmet e shkaktuara.
Kjo faktohet edhe nga të dhënat e bëra publike së fundmi nga Autoriteti i Mbikëqyrjes Financiare lidhur me Tregun e Sigurimeve.
Dëmet e paguara nga kompanitë e sigurimit për periudhën Janar – Mars 2019 arritën në mbi 1,5 miliardë lekë ( mbi 12 milionë euro ), me një rritje prej 11.82% krahasuar me tremujorin e parë të vitit 2018.
Por ky trend pozitiv ka qenë edhe për vitin 2018 ku kompanitë e sigurimeve kanë paguar rreth 7 miliard lekë ( mbi 56 milionë euro ) dëme ndaj të siguruarve ose rreth 26.3% më shumë se sa në vitin 2017. Këta tregues dëshmojnë seriozitetin e këtij tregu ndaj klientëve te tij, duke reaguar në kohën e duhur për dëmet e ndodhura.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Përfaqësues nga ky treg garantojnë se do të vijojnë t’i shërbejnë në kohë reale klientëve duke shlyer dëmet sipas afateve që parashikon ligji.
Sa i përket shifrave të fundit të bëra publike nga AMF, në tre muajt e këtij viti të ardhurat nga primet e shkruara bruto të sigurimit kapën vlerën mbi 3,969 milionë lekë, ose 11.78% më shumë se në periudhën Janar – Mars 2018.
Në këtë periudhë ka shënuar rritje me 5.68% edhe numri i kontratave të sigurimit të lidhura , duke arritur në 276,006.
Sipas AMF-së trendi vazhdon të mbetet i njëjtë: tregu është i orientuar tek sigurimet e Jo-Jetës, të cilat sollën 91.78 % të vëllimit të përgjithshëm të primeve, duke i lënë përkatësisht sigurimet e Jetës me 7.25% dhe veprimtarinë e risigurimit me 0.97%.
Sipas llojit të sigurimit : primet e shkruara bruto të sigurimit vullnetar zënë 41.93% dhe primet e shkruara bruto të sigurimit të detyrueshëm zënë 58.07% të totalit të tregut.
Primet e sigurimit të detyrueshëm motorik dominojnë dhe për periudhën Janar- Mars 2019, ku këto prime arritën rreth 2,305 milionë lekë, ose 4.29% më shumë se në periudhën Janar – Mars 2018.
Për periudhën Janar – Mars 2019, krahasuar me të njëjtën periudhë të vitit 2018, rezultojnë këta tregues :
- produkti Karton Jeshil pati një rritje prej 11.97%,
- produkti MTPL e brendshme pati një rritje prej 3.44%
- produkti Sigurim Kufitar pati një ulje prej 18.00%
Sipas njoftimit te AMF-së, primet e sigurimit vullnetar, gjatë periudhës Janar – Mars 2019 arritën rreth 1,664 milionë lekë, ose 24.12% më shumë se në periudhën Janar – Mars 2018.
