Opozita, pas protestës së 16 shkurtit, ka djegur mandatet e deputetëve, në shenjë proteste kundër qeverisë, të cilën e akuzon se ka ardhur në pushtet me votat e blera nga paratë e krimit.
Opozita ka deklaruar se nuk do të futet në zgjehdjet e qershorit, duke vënë si kusht të panegociueshëm, largimin e kryeministrit Rama, për ti hapur rrugën krijimit të një qeverie tranzitore, që sipas tyre do të përgatisë zgjedhje të lira dhe të ndershme.
Ndërkohë, disa ditë më parë, kryetari i Partisë Demokratike, Lulzim Basha firmosi një marrëveshje me partitë e vogla aleate, për krijimin e koalicionit opozitar.
Por, mes partive me të cilat ka nënshkruar marrëveshje Lulzim Basha, janë edhe ish-aleatët e Edi Ramës.
Në koalicionin opozitar të Lulzim Bashës, tashmë janë edhe Lëvizja Socialiste për Integrim, dhe Partia për Drejtësi Integrim dhe Unitet.
Por, çfarë mendonte në 2017-ën, Lulzim Basha për PDIU-në dhe LSI-në, që sot i mban në gji.
Më poshtë, po sjellim një video të fjalës së kreut të PD-së, gjatë një takimi me banorët e Dibrës, në 10 qershor të vitit 2017, ku Basha i cilësonte partitë që sot i ka aleate, si shushunja.
Basha iu ka sugjeruar atyre që më mirë ta hedhin votën në lumin Drin i Zi se t’ia japin PDIU-së.
“Asnjë votë për shushunjat. Koha e shushunjave në pushtet merr fund në 25 qershor. Janë bërë xhind, është bërë bishë Ilir Meta. Pse u bë bishë? Sepse e shikonte veten një dorë në bakllava, një dorë në sheqerpare. Por mesa shoh dorën në bakllava nuk ka për ta pasur kurrë më, por edhe këta të sheqerpares kanë ndërmend t’ia heqin dorën. Edhe këta të PDIU që janë futur me kokë në qypin e turishive, më mirë hidhini në Drin votat sesa tja jepni këtyre, më mirë në Drin të Zi sesa këtyre’, tha Basha./ CNA.al
