Aksidenti i rëndë te “Shkalla e Tujanit”, shkon në dy numri i viktimave

Ka shkuar në dy numri i viktimave të aksidentit të ndodhur gjatë pasdites së djeshme në afërsi të ”Shkallës së Tujanit” në Tiranë. Mësohet se ka ndërruar jetë në spital, 73-vjeçarja Defa Kaloshi, e cila është nëna e drejtuesit të mjetit, i cili humbi kontrollin dhe për pasojë doli nga rruga.

Në gjendje të rëndë për jetën është edhe pasagjeri tjetër që ndodhej në mjet, ndërkohë që dje humbi jetën Hidër Daci, 68-vjeç, po ashtu pasagjer në makinë.

I vetmi që duket se nuk ka marrë plagë të rënda, që mund ti shkaktonin pasoja për jetën është drejtuesi i mjetit, i cili është shoqëruar nga Policia për të mësuar detaje rreth ngjarjes.

Aksidenti ndodhi në një zonë e cila është kantier ndërtimi, në pikënisje të “Rrugës së Arbërit”, dhe duket se shpejtësia e lartë ka bërë që të shkaktohet kjo përplasje me pasoja të rënda për jetën e dy qytetarëve.