Një muaj pas grabitjes së fuqishme që ndodhi në pistën e aeroportit të Rinasit, është publikuar shifra e parave të vjedhura.
Sipas burimeve zyrtare shifra e grabitur është 6 milion euro.
Këtë shumë e kanë konfirmuar në ambjentet e prokurorisë, tre bankat paratë e të cilave ranë pre e grabitjes së madhe.
Grabitja u krye në datën 9 prill në pistën e aeroportit të Rinasit, në barkun e avionit të linjës “Austrian Airlines”, brenda të cilit u morën thasë me para nga persona në atë kohë të paidentifikuar.
Më pas gjatë përleshjes me policinë, ndërroi jetë njëri prej grabitësve, Admir Murataj.
Në ditët në vazhdim u arrestuan si pjesëmarrës 4 shtetas: Alkond Bengasi , Oltion Veseli, Saimir Çela si dhe Renaldo Sula.
Në mediat kombetare dhe jo vetëm, kjo ngjarje bëri mjaft bujë si dhe u diskutua gjerësisht mbi shumën që mund të kishin marrë autorët, por dhënia e kësaj shifre zyrtare nga ana e autoriteteve është bërë e mundur vetëm ditën e sotme.
