Parku Rinia do të rehabilitohet. Bashkia e Tiranës ka shpallur tenderin, me një fond limit mbi 104 milionë lekë. Sipas të dhënave të Open Procurement Albania Prokurime për Njësi të Qeverisjes Vendore, afati për mbylljen e punimeve është 8 muaj nga dita e lidhjes së kontratës.
Tenderi do të zhvillohet më datë 3 qershor të këtij viti. Ky është edhe afati i fundit për dorëzimin e dokumenteve.
Sipas Planit të Studimit, sheshi do të konceptohet me material ekologjik, ku edhe koshat e plehrave do të jenë material druri. Sheshi do të ndahet në mini zona, shkallaret propozohen si bordura ku njerëzit mund të qëndrojnë; është parashikuar pjesa e lëndinës, si një hapësirë shplodhëse për piknik, sheshi për fëmijë; sheshi për lojëra tavoline për të rriturit, si dhe sheshi për kafshët.
Gjithashtu, në Parkun Rinia është parashikuar edhe një zonë për përfshirjen e zgarave për parkimin e biçikletave, të cilat do të pozicionohen në pjesën veriore të parkut, kryesisht tek hyrjet kryesore.
