“E shkarkuam që në 2019” PD i kthen ‘kusurin’ Besart Kadiajt, nxjerr dokumentin: Krijoi lëvizje të financuar nga klientë të qeverisë

Sot u bë i ditur lajmi se Besart Kadia u emërua zv.ministër i Financave.

Më herët ai ka mbajtur postin e sekretarit për sipërmarrjen e lirë në Partinë Demokratike si dhe këshilltar i kryetarit të kësaj force politike Lulzim Basha.

Por në lidhje me këtë polemikë ka reaguar dhe Partia Demokratike me anë të një dokumenti zyrtar.

Në të thuhet se Kadia është shkarkuar që në 2019, pasi sipas tyre kishte krijuar një lëvizje politike të financuar nga klientë të qeverisë.

”Z. Besart Kadia, është shkarkuar nga funksioni i anëtarit të Këshillit Kombëtar të PDSH, që më datë 5 Nëntor 2019, për shkak se ishte nismëtar i krijimit të lëvizjes politike “Alternativa”, e financuar sipas informacioneve të verifikuara nga burime të dyshimta financiare të klientëve preferencial të Qeverisë. Që nga ajo datë z. Kadia nuk ka asnjë funksion në PD dhe nuk mund të ketë as në të ardhmen. Atij i është hequr e drejta për të zgjedhur dhe për t’u zgjedhur në strukturat e Partisë Demokratike, për shkelje të parimeve bazë të funksionimit të PDSH, të sanksionuar në nenin 9 të Statutit të PDSH-së.”– shkruan PD.