Mirëditorët protestojnë kundër ndërtimit të HEC-eve

Banorët e zonës së Kaçinarit në Mirditë po zhvillojnë një protestë kundër ndërtimit të 4 heceve pasi sipas tyre dëmtohet bujqësia dhe agroturizmi.

Ata janë shprehur shumë ashpër në lidhje me ndërtimin këtyre heceve duke paralajmëruar përplasje fizike dhe zhvillimin e një proteste akoma më të madhe në qytetin e Mirditës.

“7 katune do të mbeten, pa ujë. Jemi kundra kësaj masakre. Fshati Kaçinar ka qenë më i madhi në zonën e Mirditës. Na kanë marrë Bjeshkët, na kanë marrë mineralet. Tani duan të na marrin dhe ujin , po kërkojnë të shpopullojnë zonën. Ne jetojmë me bujqësinë.

Mos boni vaki të ndërhyni në zonën e Kaçinarit. Do të marrim  masa për këtë gjë. Do të degjenerojë dhe në përplasje fizike.

Pa ujë ska jetë, ne nuk do lejojmë këtë gjë se kërkojnë të na marrin jetën.” u shpreh një protestues.

Gazetari i Fax News Martin Marku tha që banorët kanë paralajmëruar zhvillimin e një proteste akoma dhe më të madhe në zonën e Rrëshenit.  Ata kanë mësuar lajmin nëpërmjet facebook-ut dhe se firmat që po ndërtojnë këto hece janë firma fantazëm.

Gazetai thotë se janë parë punonjësit duke bërë matje. ”Banorët kanë vreshtari dhe të mbjella, nëse uji futet në tubacione do të dëmtohen prodhimet e tyre dhe fshatrat do të mbeten pa ujë.”

Një nga banorët e zonës që po proteston thotë që po të jetë e nevojshme do ta mbrojnë zonën dhe me kanun.

“Edhe me kanun uji dhe natyra nuk duhet të preket. Enver Hoxha na mori ujin dhe tokat, po përsëritet e njëjta gjë.” u shpreh një banor.

Për Fax news ka folur gjithashtu dhe kryeplaku i zonës së Kaçinarit dhe tha se do mbështesë banorët e fshatit të tij.

“Dëmtimi i heceve dëmton të ardhurat e banorëve pasi mbijetojnë vetëm nga bujqësia dhe demton gjithashtu dhe turizmin. Njoftimi na ka ardhur vetëm një natë para.” u shpreh kryeplaku./FaxNews/