Një mjet tip “BMW” i është bërë me shenjë ndalimi në pikën e kontrollit të ngritur nga ana e “Shqiponjave” dhe “Shigjetave”. Drejtuesi i mjetit nuk i është bindur urdhërit të efektivit të Policisë dhe është larguar me shpejtësi, duke e dhunuar dhe goditur me mjet efektivin e Policisë, i cili ka marrë demtime të lehta dhe ndodhet jashtë rrezikut për jetën.
Pas disa minuta ndjekjeje, “Shqiponjat” kanë kapur dhe kanë prangosur shtetasin A. G., 27 vjeç, banues në Tiranë. Shtetasi është shoqëruar në Komisariatin e Policisë Nr. 2 dhe nga verifikimi i kryer ka rezultuar se drejtonte mjetin pa lejen përkatëse të drejtimit.
Në përfundim të veprimeve, specialistët në Komisariatin e Policisë Nr. 2 bënë arrestimin në flagrancë të shtetasit A. G., për veprat penale “Mosbindje e punonjësit të policisë”, “Kundërshtim i punonjësit të policisë me dhunë” dhe “Drejtim mjeti në mënyrë të parregullt”.