Lëkundjet e fundit të tërmetit që kanë ndodhur në Shqipëri, më të fundit gjatë natës sapo lamë pas, kanë rikthyer frikën në rradhët e qytetarëve.
Ata mendojnë se mos përsëritet i njëjti skenar i shtatorit dhe nëntorit të vitit të kaluar, ku dy tërmete të fuqishme goditën vendin tonë.
Në lidhje me këtë situatë të krijuar ka folur dhe sizmiologu Rrapo Ormeni.
Ai është shprehur se njerëzit nuk duhet të kenë frikë, pasi tërmetet e fundit nuk kanë lidhje me atë të Durrësit.
“Tërmeti i shtatorit të shkuar ishte në një zonë tjetër. Kurse këto lëkundje kanë ndodhur në zonën Lushnje-Elbasan-Dibër, që është një zonë aktive sizmike.
Tërmete të këtij niveli janë gjeneruar vit për vit në këtë zonë.
Ky tërmet është shoqëruar nga disa pasgoditje. Është karakteristikë për këtë zonë. Në vitin 2015 aty ka rënë një tërmet me shkallë 5.0.
Njerëzit, pas goditjes së 26 nëntorit, tani janë më të ndjeshëm, por më përpara kanë ndodhur të tilla lëkundje dhe njerëzit nuk duhet të kenë probleme për tërmete 4.6 apo 5.0.
Goditja kryesore ka qenë 4.6 dhe lëvizjet e tjera janë më të vogla dhe po vijnë duke u shuar,” tha Ormeni.