LIGJET E BIZNESIT
Gjyqtarja e Korçës Mimoza Margjeka e cila ndodhet nën masën e sigurisë “arrest shtëpie” pasi akuzohet se ka marrë 6 mijë euro për të liruar nga burgu një të dënuar, ka bërë së fundmi një lëvizje të fortë.
Mësohet se ajo ka kërkuar leje nga SPAK për të takuar të bijën, e cila sipas gjyqtares ka pësuar hemoragji dhe mjeku ka dhënë rekomandim që të shkojë të specialisti.
Në këto kushte, Margjeka shprehet se nuk ka të afërm të tjerë që ta ndihmojnë dhe kërkon leje për të ndjekur mjekimet e vajzës dhe ta shoqërojë atë në spital.
Por kërkesa e saj për leje nuk është miratuar.
Nga ana tjetër bashkëshorti i saj që do të merrte dhe paratë, është lënë nga gjykata në masën “Arrest me burg”.
“Gjatë kohës që ndodhem në masë arrest shtëpie vajza ime ka manifestuar një gjendje hemorragjie, gjak nga hundët, ngjarje e ndodhur në datën 15.09.2020. Kam njoftuar mjekun e lagjes, i cili nëpërmjet rekomandimit me shkrim ka udhëzuar për vizitë klinike pranë specialistit përkatës. Në kushtet që ndodhen në arrest shtëpie e kam të pamundur të asistoj vizitat dhe mjekimin e vajzës për shkak se edhe bashkëshorti siç edhe jeni në dijeni ndodhet në paraburgim me vendim gjykatë dhe nuk kam njerëz të tjerë familjare apo të afërm të më ndihmojë. Ju lutem më mundësoni nëpërmjet ndonjë akti shkresor të lëshuar nga ju, miratimin e shoqërimit të vajzës në kryerjen e vizitave mjekësore”, thuhet në kërkesën e gjyqtares Margjeka.
