LIGJET E BIZNESIT
U raportua si një aksident rutinë, ku në autostradë një makinë përplas një këmbësor, i cili kalon rrugën në mënyrë të papërgjegjshme, por fatmirësisht ky i fundit kishte shpëtuar…
Ish-kryeministri Sali Berisha dhe faqet interaktive si JOQ, nisën të publikonin mesazhe dhe denoncime nga të afërm dhe miq të të riut, ku thuhej se ai ishte në një gjendje kritike për jetën.
Redaksia e Dosja.al u mobilizua për të verifikuar informacionet kontradiktore që vinin nga politika dhe nga institucionet.
Gjatë javës së parë, i riu nuk është identifikuar dot, ndërkohë që burime nga recepsioni i Spitalit Ushtarak i thanë Dosja.al se ai është regjistruar si një 76-vjeçar, por pa emër dhe mbiemër.
Ishte sërish Berisha që publikoi të dhëna për aksidentin, ku shihej gjendja e rëndë e Nertil Pëllumbit, 17-vjeçari tashmë i identifikuar që u përplas nga gazetarja Mira Kazhani.
Gazetarja u kundërpërgjigj duke thënë se familjarët e saj i kanë qëndruar natë e ditë mbi kokë të miturit.
Por e vërteta është krejt ndryshe…
Dosja.al shkoi një ditë pas reagimit të gazetares Mira Kazhani në spitalin e Traumës në Tiranë.
Aty takuam familjarë dhe kushërinj të Nertil Pëllumbit, të cilët u shprehën se kanë bërë një pakt me babain e gazetares Mira Kazhani.
“Nuk flasim dot për mediat. Ne do të flasim kur Nertili të ngrihet në këmbë. I kemi premtuar babait të Mira Kazhanit që nuk do të flasim për mediat. Ata na premtuan se do të paguajnë të gjitha shpenzimet e trajtimit mjekësor të të riut”.
Ndërkohë që Policia e Shtetit vazhdon të jetë hermetike për këtë rast të pazbardhur dhe të manipuluar në të gjitha aspektet.
Interesant mbetet padyshim kontradikta mes gazetares që thotë se ka qendruar pranë të miturit që aksidentoi dhe familjarëve që thonë se Mira Kazhani nuk ka qenë kurrë në spital.
“Mira Kazhani nuk ka qenë kurrë në spital, babai i saj erdhi paraditen e sotme” u shpreh babai i Nertil Pëllumbit.
Ndërkohë Dosja.al gjithashtu ka mësuar se i mituri është shpërfytyruar tërësisht nga përplasja.
Përplasja ka qenë aq e fortë saqë i riu ka kërcyer në korsinë tjetër të autostradës.
Zëdhënësi i Policisë së Shtetit, Gentian Mullaj tha në një prononcim për Dosja.al:
Pas verifikimeve, gazetarja Mira Kazhani po ndiqet në gjendje të lirë.
Ne do ta ndjekim rastin e Nertil Pëllumbit, dhe jo sepse siç shumë mund ta mendojnë si një sulm ndaj koleges Kazhani.
Aksidentet ndodhin kudo, e siç do të thoshtë Elisa Spiropali me to bëhen edhe filma, por ky është një rast flagrant, ku e vërteta po fshihet…se për llogari të kujt, edhe kjo është një pyetje me përgjigje në kohën e duhur.
Dosja.al
