LIGJET E BIZNESIT
Një ditë pas skandalit që u publikua në programin investigativ “Stop” ku thuhej se Zyra Arsimore në Peshkopi me drejtuese Brikena Dani ka bërë një sërë shkeljesh dhe abuzimesh, menjëherë ndaj saj dhe një ish-drejtori shkolle kanë nisur hetimet.
Brikena Dani do të procedohet penalisht së bashku me ish-drejtorin e fshatit Selishtë Avni Delishi, i cili ka ikur në Londër në mars por ka vijuar të marrë rrogën.
NJOFTIMI ZYRTAR I POLICISE
Specialistët e Seksionit për Hetimin e Krimit Ekonomik e Financiar në DVP Dibër kanë filluar procedimin penal në gjendje të lirë për shtetasit:
- D., 25 vjeç, banues në Selishtë, Dibër, ish-drejtor në shkollën 9-vjeçare Selishtë, i dyshuar për kryerjen e veprave penale “Vjedhja duke shpërdoruar detyrën” dhe “Shpërdorim i detyrës”.
- D., 39 vjeçe, banuese në Peshkopi, Dibër, me detyrë drejtore në Zyrën Vendore Arsimore Peshkopi, e dyshuar për kryerjen e veprës penale “Shpërdorim i detyrës”.
Procedimi penal ndaj shtetasve të lartpërmendur ka filluar pasi nga veprimet hetimore të kryera ka rezultuar se shtetasja B. D. ka paguar shtetasin A. D., gjatë periudhës që ai nuk ka qenë brenda territorit të Republikës së Shqipërisë. Sipas verifikimeve të kryera shtetasi A. D. është larguar nga territori i Republikës së Shqipërisë në vitin 2019 dhe ka përfituar paga në mënyrë të padrejtë.
Materialet hetimore u referuan në Prokurorinë pranë Gjykatës së Shkallës së Parë Dibër, për veprime të mëtejshme.
