LIGJET E BIZNESIT
Dy ngjarje të rënda kanë ndodhur së fundmi në spitalin COVID2 “Shefqet Ndroqi”, ku 2 pacientë të infektuar me COVID19 i dhanë fund jetës pasi u hodhën nga godina.
Ndërkohë deputeti Gjetan Gjetani ka folur në lidhje me ndarjen nga jeta të vjehrrit të tij Hasan Mira, 65 vjeç, i cili ishte personi i dytë që u vetëvra në spitalin e Senatoriumit, pas 29 vjecarit Xhino Koça nga Durrësi.
Gjetani është shprehur se vjehrri gëzonte një shëndet të plotë dhe e ka kuptuar me shumë vonesë se ishte prekur nga COVID19.
Gjithashtu ai ngriti dy shqetësime në programin “Abc e mëngjesit”, ndërsa theksoi se në spital nuk duhet të mungojë psikiatri dhe se personat e prekur me koronavirus, nuk duhet të shtrohen në katin e katërt.
“Ishte një rrufe në qiell të hapur. Gëzonte një shëndet shumë të mirë. Nga sa më kanë thënë mjekët, kishte mbi dy javë i infektuar. Ka pasur një fizik shumë të mirë dhe nuk e ka kuptuar sëmundje. Sipas mjekëve është konstatuar shumë vonë. Për shërbimin e mjekëve nuk kam asnjë ankesë, por të themi realitetin dhe të jemi të sinqertë nga ana e qeverisë ka shumë mangësi. Në Sanatorium nuk ka një psikiatër, njerëzit me probleme të tilla nuk mund të shtrohen në katin e katërt. Duhet të merren masa që persona me probleme të tilla të shtrohen në katin e parë. Ishte në një gjendje të mirë shëndetësore, COVID-19 nuk e ka kuptuar fare, kishte mbi dy javë. Doktorët e Burrelit nuk e kanë zbuluar këtë sëmundje. Por kur ka bërë një vizitë në Sanatorium është konstatuar me koronavirus”, u shpreh ai.
Mjekët kanë thënë që COVID-19 i ka shkaktuar dëmtime në tru?
Gjetani: Sipas mjekëve COVID-19 godet organizmin njeriut në pikën më të dobët. Ka persona që i ka goditur në mushkëri. Në rastin konkret i ka goditur sistemin nervor. Kur unë e kam takuar ka qenë shumë mirë, nuk arrita ta besoj. Në spital kam hyrë, e kam parë me sytë e mi, kam parë edhe angazhimin e përkushtuar të mjekëve. Janë vërtet heronj, pasi përballen edhe me problemet e qytetarëve.
Kishte shfaqur shenja agresiviteti më parë?
Gjetani: Jo, vetëm të mërkurën në mëngjes i ka shfaqur këto probleme.
