Policia kufitare ka sekuestruar sot në portin e Durrësit rreth 60.000 euro si dhe një sasi bizhuterish floriri të padeklaruara te autoritetet.
Për pasojë një person ka rënë në pranga për veprën penale “Mosdeklarimi në kufi i të hollave dhe sendeve me vlerë”.
Sipas njoftimit zyrtar të policisë, është kaluar në vijën e dytë për kontroll më të rëndësishëm, minibusi i linjës Shqipëri – Francë – Shqipëri, me drejtues shtetasin A.M.
Gjatë kontrollit nga specialistët për Hetimin e Krimeve në Pikën e Kalimit Kufitar Port Durrës, në bashkëpunim edhe me specialistët e Trafiqeve të Paligjshme dhe ata të hetimit të Krimit Ekonomik e Financiar në DVP Durrës, në kabinën e shoferit A.M., janë gjetur dhe sekuestruar në cilësinë e provës materiale 60960 euro si dhe 46 bizhuteri floriri.
Në vijim të veprimeve hetimore, është arrestuar drejtuesi i mjetit, A.M., 48 vjeç, banues në Shkodër.
Nën drejtimin e Prokurorisë së Rrethit Gjyqësor Durrës, Specialistët për Hetimin e Krimit Ekonomik e Financiar në DVP Durrës, po vijojnë punën për zbardhjen dhe dokumentin e plotë ligjor të kësaj ngjarjeje, njoftoi policia.
