Ka nisur protesta e naftëtarëve përpara Rafinerisë së Naftës në Ballsh.
Situata është shoqëruar me tensione të shumta, ku punëtorët dhe familjet e tyre po kërkojnë rrogat e prapambetura.
Gjendja është përkeqësuar më shumë dhe kanë nisur shtyrjet dhe përplasjet fizike mes punonjësve dhe administratorëve, në momentin që kanë mbërritur këta të fundit.
“Duam lekët, lidhni kontratë me ne, na jepni lekët”,-ka thënë njëri prej tyre.
Ndërkohë përfaqësuesja e firmës iu është drejtuar se nuk do të ketë pagesë nëse nuk ka kontratë mes firmës dhe punonjësve.
Situata është rënduar dhe më tej pasi naftëtarët kanë thyer kordonin policor dhe kanë hyrë në oborrin e uzinës. Me megafonë në duar, ata kanë shtyrë policët dhe kërkojnë që firma t’ju japë zgjidhje.