Ky që shihni në këtë foto është Ilir Berberi, i konsideruar si i “forti” i Pogradecit dhe në qytet thirret “Liri i Rushkës”, për shkak se nëna e tij, quhet Ruzhdie.
Berberi, së bashku me Meard Berberin ose “Koron” dhe disa persona të tjerë, dyshohen nga policia dhe prokuroria e Pogradecit, se kanë organizuar dy sulmet me armë të datës 1 dhe 8 gusht 2020 në hotel “Voloreka” në Drilon. Për më tepër Ilir Berberi, është marrë i pandehur dhe shpallur në kërkim qysh prej datës 11 gusht 2020 për akuzën e “Kanosjes për të mos kallëzuar” kryer ndaj biznesmenit Jetmir Muçllari, “Kundërshtim të forcave të policisë” kryer në bashkëpunim dhe “Kundërshtimi i punonjësit që kryen një detyrë shtetërore”.
Këto vepra penale, Ilir Berberi i ka kryer gjatë muajit shkurt 2020 në ambientet e gjykatës së Pogradecit, ku Berberi së bashku me djalin e tij, Firdeus Berberi, Meard Berberi dhe Xhuljano Topuzi, vëllain e Mariglen Topuzit, kanë kërcënuar me jetë dëshmitarin Jetmir Muçllari, i cili do dëshmonte në një proces gjyqësor kundër Mariglen Topuzit, të akuzuar për djegie makine.
Këta persona i kanë pohuar Muçllarit se nëse do dëshmonte kundër Topuzit do e vrisnin atë dhe djalin e tij. “Liri i Rushkës” i konsideruar si i “forti” i Pogradecit qëndronte i fshehur në një çadër me ngjyrë rozë të vendosur në një pyll, ku flinte me bashkëjetuesen dhe vajzën e tij 3 vjeçe.
Sipas dosjes që “Shqiptarja.com” disponon arrestimi i Ilir Berberit është kryer në vendin e quajtur “Bregu i Muçit” mbi fshatin Verdovë Pogradec, ku është konstatuar në pjesën e pyllëzuar sipër fshatit një çadër fushimi me ngjyrë rozë, e fiksuar në tokë midis disa gurëve që ndodheshin aty.
Në raportin e policisë thuhet se: “…me të konstatuar këtë çadër duke dyshuar se aty mund të ishte fshehur personi në kërkim Ilir Berberi, shërbimet e policisë kanë shkuar brenda saj dhe aty është gjetur Ilir Berberi, i cili po flinte në një dyshek në tokë brenda çadrës…”.
Gjithashtu brenda në çadër është gjetur duke fjetur edhe Blerina Poçe së bashku me një fëmijë të moshës 3 vjeç, A.B. Blerina Poçe, është bashkëjetuese e Ilir Berberit. Gjatë kontrollit të ushtruar në çadër, janë gjetur të futura në një qese plastike 58 fishekë pistolete. Teksa ka gjetur këtë qese me fishekë, policia ka ushtruar kontroll të imtësishëm brenda çadrës dhe më pas është konstatuar poshtë dyshekut të fjetjes një armë zjarri pistoletë model CZ 9 milimetërshe.
Arma ishte e pajisur me një krehër me 7 fishekë dhe sipas policisë, një plumb është gjetur gjatë kontrollit teknik të armës në folenë e pistoletës. Pas kapjes në flagrancë është kryer prangosja e Ilir Berberit dhe shoqërimi i tij në Komisariatin e Policisë Pogradec.
Momentalisht Berberi ndodhet në burg, pasi gjykata e Pogradecit ka caktuar masën e arrestit në burg për akuzën e “Mbajtjes pa lejë të armëve dhe municioneve”, “Kanosjes për të mos kallëzuar” kryer ndaj biznesmenit Jetmir Muçllari, “Kundërshtim të forcave të policisë” kryer në bashkëpunim dhe “Kundërshtimi i punonjësit që kryen një detyrë shtetërore”.
Berberi ka apeluar vendimin dhe pritet që në ditët në vijim do jetë gjykata e Apelit Korçë, për të vendosur nëse i “forti” i Pogradecit do lirohet ose jo.
