LIGJET E BIZNESIT
Dorëzohet rektor i Universitetit Bujqësor të Tiranës, Bahri Musabelliu. Ai kundërshtoi projektin e Bashkisë së Tiranës për të ndërtuar një shkollë në ambientet e univesritetit, por mesa duket gjërat kanë ndryshuar.
Tre ditë, pasi u thirr në Prokurorinë e Tiranës për të dëshmuar mbi procedurën e lëvrimit të një fondi prej 640 mijë dollarë, me qëllim ndërtimin e një murri rrethues dhe një porte, rektori Bahri Musabelliu ka dalë me një deklaratë në favor të kryebashkiakut Erion Veliaj.
“Ndërtimi i shkollës është domosdoshmëri për komunitetin”, u shpreh sot zëdhënësi i Senatit të UBT-së lidhur me debatin që është ngritur së fundmi.
Studentë, pedagogë dhe dekanë kundërshtojnë vendimin e bashkisë së Tiranës për të ndërtuar në fidanishten e universitetit një shkollë 9-vjeçare. Disa muaj më parë, Veliaj shkoi aty për të mbjellë disa pemë, ndërsa tani ka vendosur t’i shkulë, për shkak të planit për shkollën.
Por protestuesit akuzojnë se plani për shkollën fsheh nga mbrapa ndërtimin e disa pallateve shumëkatëshe. Kjo akuzë është bërë edhe nga Partia Demokratike.
Ndërkohë, menjëherë pas deklaratës së senatit të UBT-së, edhe Bashkia e Tiranës nisi një reagim ku njoftonte për arritjen e marrëveshjes me Universitetin Bujqësor.
