‘Ka qenë në plazh’ Veliaj i përgjigjet kritikëve: U nxiva në terren, humba një pjesë të shikimit

Pas shërimit nga COVID19, kryetari i Bashkisë së Tiranës ka folur për ditët e izolimit në shtëpi.

Sipas tij ato kanë qenë të vështira, pasi ka humbur dhe një pjesë të shikimit.

“Kisha një këputje, isha i paaftë të bëja një fjalim qoftë edhe virtual për Këshillin Bashkiak. Të humbet shija, nuhatja, më humbi dhe një pjesë e shikimit, janë simptomat që të bëjnë të kuptosh se je duke kaluar COVID-in”, u shpreh Veliaj për Fax News.

Sa i përket, akuzave se ka mashtruar për infektimin, dhe se komentuesit thonë se ka qenë në plazh, kryebashkiaku u shpreh se këta të fundit e kalojnë jetën duke sharë të tjerët.

“Shiko nuk kam bërë një gjë në jetën time që të mos jetë komentuar. Unë besoj se secili prej nesh lë një gjurmë, dhe nuk mund ta kalosh jetën tënde duke sharë të tjerët. Unë kam qenë përditë në terren, dhe padyshim që do të isha nxirë, shpresa e tyre e vetme është që të vdesë kundërshtari, por një gjë ta kenë të sigurtë që nuk kam për të vdekur shpejt.”, deklaroi Veliaj.