LIGJET E BIZNESIT
Kryetari i “Zgjidhja”, biznesmeni Koço Kokëdhima, ka shkruar një letër për të gjithë diplomatët e huaj të cilët ndodhen aktualisht në vendin tonë dhe i kërkon që të ndihmojnë Shqipërinë në luftën kundër pandemisë së COVID19.
“Shqipëria është ndër vendet më të varfra të Evropës, sepse qeveriset nga një kastë e korruptuar politike dhe braktiset përditë nga shtetasit e saj që nuk shohin shpresë për ndryshim”, thekson ai.
Biznesmeni shton se Shqipëria ka nevojë për mbështetje, sidomos sot në një situatë të tillë ku e gjithë bota ndodhet në vështirësi nga pandemia COVID-19.
Kokëdhima tregon problemet me të cilët përballet qytetarët, ndërsa nuk lë pa theksuar se qeveria ka dështuar dhe se e shfrytëzoi pandeminë për të bërë tendera korruptivë që sipas tij janë tashmë objekt i hetimeve të drejtësisë.
“Në këtë situatë dramatike ju bëj thirrje, që t’u përcillni qeverive që ju përfaqësoni apelin tim, që ta ndihmoni Shqipërinë me pajisje mjekësore, spitale portativë, medikamente, kite dhe personel shëndetësor në ndihmë të kolegëve të tyre shqiptarë.
Mbështetja e vendeve që ju përfaqësoni do të shmangë një katastrofë njerëzore në vend, me pasoja edhe për rajonin e më gjerë. Ju lutem mos e lini vetëm popullin shqiptar në këto momente të vështira. Ai do ju jetë përgjithmonë mirënjohës”, shton më tej Kokëdhima.
LETRA E PLOTE
Të nderuar përfaqësues të Trupit Diplomatik të akredituar në Shqipëri!
Po ju drejtohem Ju si përfaqësues të vendeve mike dhe të shteteve të tjera në Shqipëri.
Shqipëria është sot anëtare e NATO-s, ka çelur bisedimet për anëtarësin në Bashkimin Europian dhe ka bërë shumë përpjekje për zhvillimin e saj ekonomik dhe për të qenë faktor stabiliteti në rajonin e Ballkanit Perëndimor.
Si qytetar shqiptar, si politikan në krye të një force të re politike dhe si njeri i biznesit Ju garantoj se populli shqiptar do të mbetet një aleat besnik i vendeve mike dhe partnere, por ai sërish ka nevojë për mbështetje sot kur e gjithë bota është vënë në një situatë të vështirë nga pandemia COVID-19.
Pas 30 viteve pluralizëm, Shqipëria është ndër vendet më të varfra të Europës, sepse qeveriset nga një kastë e korruptuar politike dhe braktiset përditë nga shtetasit e saj që nuk shohin shpresë për ndryshim. Ne jemi ndër vendet më të goditura nga pandemia, e cila ka vënë në rrezik të sotmen dhe të ardhmen tonë.
Prej heqjes së kufizimeve të ashpra ndaj popullsisë të aplikuara nga qeveria shqiptare në muajt mars-maj, si masa e vetme përballë një sistemi të falimentuar shëndetësor, vendi po përballet me shifra të larta të përhapjes së virusit, munrit të viktimave dhe pamundësinë e kurimit dhe shpëtimit të jetëve njerëzore në spitalet publike.
Deri sot janë zyrtarisht 200 viktima të raportuara, 6536 të infektuar dhe 2957 raste aktive. Autoritetet shëndetësore kanë bërë dhe bëjnë pak testime në ditë krahasuar me vendet e rajonit, por, megjithatë, shifrat e nxjerrin Shqipërinë ndër vendet me më shumë të infektuar dhe viktima për 1 milion banorë. Menaxhimi i situatës është lënë në dorën e Komitetit Teknik të Ekspertëve, që drejtohet nga militantë e servilë inkopetentë të kryeministrit. Qeveria e shfrytëzoi pandeminë për të bërë tendera korruptivë që janë tashmë objekt i hetimeve të drejtësisë.
Qeverisjet e Shqipërisë e kanë falimentuar sistemin shëndetësor publik. Shqipëria ka vetëm 1,2 mjekë për 1000 banorë, kur mesatarja e vendeve në zhvillimin është mbi 3 mjekë. Qeveria jep vetëm 3 për qind të PBB-së për financimin e shëndetësisë, kur vendet e Ballkanit Perëndimor e kanë deri në 7%. Shqipëria renditet ndër vendet me numër të ulët shtretërish spitalorë në raport me popullsinë, me 3 shtretër për 1000 banorë, kur vendet e tjera në rajon e kanë dysfish. Qeveria ia ka hequr fondet shërbimit shëndetësor publik, por ka lidhur mbi 310 milionë euro kontrata 10-vjeçare për koncesione dhe PPP me privatët për shërbime që nuk ndihmojnë as sistemin shëndetësor dhe as pacientët. Qindra mjekë dhe infermierë janë larguar në vendet e Europës Perëndimore dhe eksodi vazhdon.
Situata është dramatike. Kryeministri dhe ministrat janë me pushime, por numri i viktimave dhe i të infektuarve vazhdon të rritet dhe situata do të bëhet edhe më e rëndë në periudhën e vjeshtës dhe të dimrit.
Një izolim i dytë do të ishte katastrofik për vendin, ndaj duhen masa të menjëhershme dhe energjike.
Në këto kushte, ndihma e vendeve Tuaja është jetike për të sotmen dhe të ardhmen e vendit tonë.
Dy spitalet ku shtrohen dhe trajtohen të infektuarit me COVID-19 kanë tani sa të sëmurë të shtruar aq edhe shtretër dhe dy spitale të tjerë kanë mbetur pa u përfunduar, janë pa pajisje dhe personel shëndetësor. Ekipet mjekësore të pakta në numër dhe pa pajisjet e duhura po përballen me pandeminë, ndërsa qindra mijëra qytetarë nuk kanë mundësi të marrin shërbime të tjera shëndetësore, duke shtuar rrezikun për jetët e pacientëve kronikë.
Në këtë situatë dramatike ju bëj thirrje Ju që t’u përcillni qeverive që Ju përfaqësoni apelin tim, që ta ndihmoni Shqipërinë me pajisje mjekësore, spitale portativë, medikamente, kite dhe personel shëndetësor në ndihmë të kolegëve të tyre shqiptarë. Mbështetja e vendeve që Ju përfaqësoni do të shmangë një katastrofë njerëzore në vend, me pasoja edhe për rajonin e më gjerë.
Ju lutem mos e lini vetëm popullin shqiptar në këto momente të vështira. Au do ju jetë përgjithmonë mirënjohës.
Sinqerisht,
Koço Kokëdhima
