Klubi i Futbollit të Tiranës ka zyrtarizuar ditën e sotme largimin e 6 lojtarëve. Janë Erando Karabeci, Edon Hasani, Lansinet Sidibe, Ismael Dunga, Mario Morina dhe Edvan Bakaj, ata që e mbyllën aventurën me Tiranën.
Këtë lajm e konfirmuan vetë bardheblutë nëpërmjet faqes zyrtare, ku shprehen se këta lojtarë meritojnë një vend në histori, për atë që kanë dhënë për këtë klub dhe sidomos për titullin.
Tanimë ata janë lojtarë të lirë dhe mund ta vazhdojnë karrierën në skuadra të tjera.
“Faleminderit Kampionë! KF Tirana falënderon lojtarët, për gjithë kontributin e dhënë përgjatë viteve të tyre me fanellën bardheblu. Të gjithë meritojnë një vend në histori për gjithçka kanë dhënë dhe sidomos për titullin e fituar pas 11 vitesh. KF Tirana i uron suksese në vazhdim”, shkruhet në postimin e Tiranës.