“Virusi u ka prekur mushkëritë” Trondit shefja te ‘Shefqet Ndroqi’: Tamponi ju del negativ, kam mbi 200 të shtruar

Situata e pandemisë së COVID19 në Shqipëri vijon të jetë shqetësuese.

Në njoftimin zyrtar ditën e djeshme Ministria e Shëndetësisë bëri me dije se në spitalet COVID po mjekohen 112 pacientë.

Marjeta Dervishi nga Instituti i Shëndetit Publik lajmëroi se 18 pacientë janë në terapi intensive dhe 3 prej tyre të intubuar.

Por ndërkohë dr.Silvana Bala, shefe e Pneumologjisë në spitalin “Shefqet Ndroqi” ka bërë një deklaratë të fortë.

Ajo hedh dyshime se numri i të infektuarve është më i lartë nga ai që thuhet.

Në një prononcim për Tv Klan, Bala është shprehur se vetëm në spitalin “Shefqet Ndroqi” janë 210 pacientë të shtruar,  që shfaqin probleme pneumologjike dhe sipas pamjeve imazherike kanë virusin Covid në mushkëri. Ajo sqaron më tej se ka edhe të infektuar që tamponi u del negativ. Kjo sipas saj, pasi virusin këta pacientë e kanë në mushkëri dhe jo në rrugët e frymëmarrjes, ku merret sekrecioni.

“Është një situatë e rënduar. Unë kam këtu rreth 210 të shtruar. Vështirësia në frymëmarrje që është simptoma kryesor i këtyre rasteve, 2/3 e tyre dalin me tampon negativ sepse e kanë kaluar stadin e parë në shtëpi. Covid me test nazofaringial del në ditët e para. Kur infeksioni zbret poshtë testi që merret në rrugët e sipërme respiratore rezulton negativ, ama pjesët e poshtme të mushkërive janë prekur. Është vendosur pneumonia” thotë mjekja.

Ndërkohë, specialistët tek “Shefqet Ndroqi” thonë se tek urgjenca e këtij spitali paraqiten rreth 50 raste në ditë dhe gjysma e tyre shtrohen.

“Ka edhe mosha të reja që shtrohen, nga mosha 18 deri në moshën 40-vjeç.”, shprehet më tej mjekja.