“Bregu i Lumit”/ Reagon Meta: Të hetohet dhuna ndaj banorëve

Me fadroma tek dera e shtëpisë dhe më Policisë që kishin rrethuar të gjithë lagjen që në orën 06:00, kështu janë zgjuar këtë mëngjes banorët e Bregut të Lumit.

Përplasjet mes tyre dhe policisë vazhduan gjatë orëve të para të mengjesit të sotëm, ku nuk mungoi dhe gazi lotsjellës nga ana e policisë.

Pas përplasjeve u shoqëruan disa banorë në komisariat, ndërkohë të tjerë u plagosën dhe gjenden nën kujdesin e mjekësor.

Në lidhje me ngjarjet ka reaguar ashpër edhe presidenti i Republikës, Ilir Meta, nëpërmjet zëdhënësit të tij, Tedi Blushi.

Meta ka kërkuar ndër të tjera nisjen e menjëhershme të hetimeve për dhunën e ushtruar nga Policia ndaj qytetarëve të pambrojtur.

“Presidenti i Republikës, i kërkon: Avokatit të Popullit, të hetojë urgjentisht të gjitha veprimet e Policisë së Shtetit; Komisionerit për Mbrojtjen nga Diskriminimi, të hetojë veprimet e institucioneve shtetërore në trajtimin e rastit në fjalë;

Organit të Prokurorisë, të nisë menjëherë verifikimet përkatëse për të analizuar në detaj të gjitha veprimet arbitrare të organeve publike dhe Policisë së Shtetit, si edhe të dërgojë përpara drejtësisë të gjithë personat përgjegjës;

Organizatave për mbrojtjen e lirive dhe të drejtave themelore të njeriut, të hetojnë dhe të reagojnë për çdo akt dhune të panevojshëm që Policia e Shtetit dhe institucionet shtetërore kanë ushtruar sot ndaj qytetarëve të pambrojtur”, – thuhet në reagim.