OFL ‘zbarkon’ sot në jug/ Këta janë 5 ‘të fortët’ që duhet të deklarojnë pasurinë (EMRAT)

Operacioni Forca e Ligjit ka zbritur sot në jug të Shqipërisë.

Mësohet se u është dërguar formulary 5 të dënuarve, ku njëri prej tyre është dhe vrasësi i kryepolicit Artan Cuku.

Sipas informacioneve formulari i ka shkuar:

Bledar Jambellit, banues në Fier, i dënuar për veprën penale “Vrasja e punonjësit të policisë së shtetit” e kryer në bashkëpunim. Ai akuzohet si vrasësi i kryepolicit Artan Cuku.

Adriatik Gabës, me banim në Gjirokastër, i dënuar për veprën penale “Kultivimi i bimëve narkotike”;

Gaba, vjeç 43, banues në Lazarat, gjatë kontrollit të ushtruar me datë 25.06.2014 në banesën e tij në fshatin Lazarat, i janë gjetur 750 gr boçe dhe lëndë kanabis sativa, në momentin e ndalimit ky shtetas po drejtonte një automjet tip BMV, ku u konstatua se nuk kishte dëshmi aftësie. Ai dyshohet se gjatë zhvillimit të operacionit në Lazarat ka gjuajtur me armë policinë.

Klaudion Karagjozit me banim në Gjirokastër, i dënuar për veprën penale “Prodhimi dhe shitja e  narkotikëve”;

Xhevahir Derxhianit me banim në Lazarat Gjirokastër, i dënuar për “Kultivimi i bimëve narkotike”;

Rimet Shehut me banim në Tepelenë, i dënuar për shkelje te ligjit penal grek për narkotikët.

NJOFTIMI ZYRTAR I POLICISE

Vijon pa ndërprerë Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020.

Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:

• B. (R.) J. (M.), banues në Fier, i dënuar për veprën penale “Vrasja e punonjësit të policisë së shtetit” e kryer në bashkëpunim;
• A. G., me banim në Gjirokastër, i dënuar për veprën penale “Kultivimi i bimëve narkotike”;
• K. K., me banim në Gjirokastër, i dënuar për veprën penale “Prodhimi dhe shitja e narkotikëve”;
• Xh. D., me banim në Lazarat Gjirokastër, i dënuar për “Kultivimi i bimëve narkotike”;
• R. Sh., me banim në Tepelenë, i dënuar për shkelje te ligjit penal grek për narkotikët.

Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.

OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.

OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.