Një nga masat më të forta që mori qeveria kundër përhapjes së pandemisë është dhe ndalimi i muzikës pas orës 20.00 nëpër lokale apo moslejimi i eventeve të mëdha ku mund të grumbullohen njerëz në ambiente të tilla.
Ndër të tjera, protokollet e sigurisë në Aktet Normative ndalojnë dhe organizimin e dasmave.
Por duket se kryebashkiaku socialist i Lezhës Pjerin Ndreu ka dalë kundër kësaj ideje të qeverisë.
Sipas tij policia po bën ndëshkime selective në qytete të ndryshme lidhur me organizimin e dasmave në kohë pandemie.
Ai shton se ato janë më të theksuara se në qytetet e tjera, duke e quajtur këtë një diskriminim.
Ai shprehet se duhet vepruar me të njëjtin standard për të gjithë, ose të krijohet një protokoll me numër pjesëmarrës të limituar që të mos shkohet deri në anulim të dasmave.
“Jam pro shqetësimit të pronarëve të lokaleve të dasmave në Lezhë. Që ka diskriminim me qytetet e tjera është krejt e qartë. Gjithkush e di se dasmat në Shkodër, Tiranë, Durrës, Vlorë etj, nuk i ndalon askush.
Dikush do dalë të thotë se Akti Normativ thotë këtë dhe atë. Po dakord, po njëlloj për të gjithe. Ose një protokoll me numër të limituar pjesëmarrësish, sepse është shumë e rëndë ti ndalosh dasmën tjetrit.
Ata që i shkruajne ca gjëra si duket se kanë haberin se ca dmth me të prishe dasmën…”, shkruan Ndreu.