Pas situatës alarmante të krijuar në vend nga vatrat e zjarrit, ka reaguar dhe presidenti Ilir Meta.
Në mesazhin e tij, Kreu i shtetit ka theksuar se është duke ndjekur me shqetësim situatën aktuale të përhapjes së zjarrit në disa qarqe të Shqipërisë.
Ai i bën thirrje autoriteteve që të marrin masa të menjëhershme për të neutralizuar vatrat e zjarrit pasi po dëmtohen rëndë pasuritë publike dhe ato private.
REAGIM I PRESIDENTIT ILIR META
Presidenti i Republikës Ilir Meta është duke ndjekur me shumë shqetësim situatën aktuale të përhapjes së vatrave të zjarreve në disa qarqe të vendit.
Presidenti Meta nxit autoritetet qendrore dhe vendore për koordinimin në kohë dhe marrjen e masave të menjëhershme dhe efektive të emergjencës, për të neutralizuar çdo vatër zjarri që do të dëmtonte rëndë pasurinë publike, kombëtare dhe atë private.
Duke theksuar rëndësinë e ruajtjes së mjedisit dhe të natyrës, Presidenti Meta tërheq veçanërisht vëmendjen për eliminimin e rrezikut për jetët e qytetarëve.
