Bardhi i përgjigjet Ramës: Ne koalicionin e kemi me qytetarët

Sekretari i Përgjithshëm i Partisë Demokratike, Gazment Bardhi i ka kthyer përgjigje kryeministrit Edi Rama, i cili hedh akuza ndaj PD-së dhe opozitës së bashkuar se po bëhen pengesë për hapjen e listave, madje po e zvarrisin këtë process.

Nëpërmjet një postimi në Twitter, Bardhi shprehet se heqja e koalicioneve parazgjedhore, pragu kombëtar për partitë e vogla dhe ndryshimi i zonave zgjedhore, nuk janë risi, por halli personal i Edi Ramës.

Bardhi shkruan se PD-ja dhe opozita e bashkuar e kanë koalicionin me qytetarët dhe janë dakord për hapjen e listave 100%.

Reagimi i plotë i Bardhit

Heqja e koalicioneve parazgjedhore, pragu kombëtar për partitë e vogla dhe ndryshimi i zonave zgjedhore, nuk janë risi, por halli personal i ER me zgjedhjet e ardhshme dhe halli i krimit të organizuar me Qeverinë e ardhshme. Këtë nuk ta zgjidh dot PD dhe Opozita e Bashkuar, sepse ne koalicionin e kemi me qytetarët dhe jemi të vendosur ta ruajmë dhe t’i shërbejmë vetëm interesit të Shqipërisë/shqiptarëve. Aktet e njëanshme të koalicionit të krimit të organizuar marrin peng Shqipërinë dhe minojnë zgjedhjet dhe të ardhmen europiane të Shqipërisë. Opozita e Bashkuar është 100 % dakord, për hapjen 100% të listave të kandidatëve. Për këtë jemi të gatshëm të punojmë në një proces gjithëpërfshirës dhe të hapur, pa ndërprerje dhe pa asnjë vonesë.