Rama vijon ti qëndrojë mendimit se ndryshimet Kushtetuese do të miratohen në seancën plenare të 30 korrikut.
Mesazhin e fortë të rradhës e lëshoi sot gjatë fjalimit nga foltorja e Kuvendit.
Kreu i qeverisë theksoi se marrëveshja e 5 qershorit nuk do të preket.
Rama shtoi se pas ndryshimit të Kushtetutës mund të diskutohen çështjet zgjedhore siç janë listat e hapura dhe koalicionet parazgjedhore.
“Doni apo nuk doni, në 30 korrik do të votojmë ndryshimet Kushtetuese. Ata që shantazhojnë asgjë s’kanë për të fituar. Ne do t’i qëndrojmë marrëveshjes së 5 qershorit. Marrëveshja e 5 qershorit nuk është bllokimi i neneve që duhet të reflektojnë ndryshimet Kushtetuese. Ajo marrëveshje flet për administratën zgjedhore, financimin e partive. Ato nuk preken.
Pas votimit të gjithë janë në të drejtën e tyre për të diskutuar. PD të mos lodhet duke kundërshtuar 30 korrikun. Është një marrëveshje e nënshkruar dhe të gjithë ata që e kanë marrë përsipër ta votojë, le ta votojnë. Është e mbyllur, është vullneti i këtij parlametni që mund të jetë ilegjitim sipas Ilir Metës, sipas rastit. Se kur votohet 5 qershorit nuk janë 82, por më shumë dhe kur votohet 30 korriku, janë 82…
Kështu që, ne udhëheqim dhe natyrisht kjo na sjell në situata konflikti që nuk janë zgjedhja jonë. Ne jemi për dialog dhe komunikim me të gjithë. S’kam refuzuar të ulem me Lulzim Bashën, ka refuzuar Lulzim Basha të ulet me mua. S’ka refuzuar PS të ulet me PD-në, por ka refuzuar PD-ja të ulet me PS-në. Për koalicionet ka kohë për të diskutuar”, u shpreh Rama.