Pas një gare të fortë mes 4 kandidatëve, ditën e sotme do të shpallet fituesi i cili do të drejtojë Byronë Kombëtare të Hetimit, e ashtuquajtur dhe si FBI shqiptare.
Do të jetë SPAK që do të zgjedhë emrin e ri ndërmjet kandidatëve Aida Hajnaj, Artur Beu, Ervin Hodaj dhe Idajet Faskaj.
Që të katërt kanë formim policor dhe kanë mbërritur deri në fazën finale.
Drejtuesi i SPAK Arben Kraja do të lajmërojë sot se cili do të jetë fituesi dhe më pas emri i tij do t’i dërgohet KLP-së për votimin përfundimtar.
Kujtojmë se BKH është një njësi e specializuar e policisë gjyqësore që heton veprat penale nën juridiksionin e Prokurorisë së Posaçe, sikurse autorizohet në ligjin për SPAK-un, 2016. Një skuadër prokurorësh të posaçëm do të punojnë së bashku që në mënyrë proaktive hetojnë dhe ndjekin penalisht zyrtarë qeveritarë dhe të tjerë që dyshohen që janë të përfshirë në vepra penale në lidhje me krimin e organizuar dhe korrupsionin.
Menjëherë sapo Këshilli i Lartë i Prokurorisë (KLP) të votojë kreun e BKH-së, do të nisë procesi i për përzgjedhjen e 60 oficerëve të kësaj strukture, të cilët do të trajnohen nga FBI-ja amerikane.
Punonjësit e BKH-së supervizohen dhe operojnë vetëm nën drejtimin e Drejtuesit të Prokurorisë së Posaçme dhe Prokurorëve të Posaçëm të Prokurorisë së Posaçme.