PD i përgjigjet Gjiknurit: Rama po tenton të manipulojë rregullat e lojës

Pas letrës publike të Damian Gjiknurit në lidhje me çështjen e sistemit zgjedhor, hapjne e listave dhe koalicionet parazgjedhore, ka ardhur reagimi edhe nga Opozita e Bashkuar.

Numri dy i PD, Gazment Bardhi përmes një postimi në rrjetet sociale ka shkruar se këto justifikime janë një tentativë e kryeministrit Rama për të manipuluar rregullat e lojës.

Bardhi shtoi më tej se çdo ndryshim i njëanshëm i Kushtetutës nuk do pranohet nga opozita e bashkuar.

Postimi i plotë:

Ndryshimi i njëanshëm i Kushtetutës është provë që Edi Rama vazhdon koalicionin me krimin e organizuar.

Zgjedhjet në Shqipëri nuk i ka dëmtuar pjesëmarrja e partive politike në zgjedhje, por bashkëpunimi i Damianit me Ymer Lalat në blerjen e votave, bashkëpunimi i Vangjushit me Avdylajt në caktimin e kandidatëve dhe kërcënimin e votuesve, etj. Pra, zgjedhjet i ka dëmtuar koalicioni i Edi Ramës me krimin e organizuar dhe jo koalicioni parazgjedhor i partive politike.

I braktisur nga qytetarët, Edi Rama po tenton të prish rregullat e garës në mënyrë të njëanshme, i friksuar nga humbja e zgjedhjeve dhe pushtetit të tij personal, që në 7 vjet e përdori vetëm për të mbështetur veten, oligarkët dhe krimin e organizuar!

Asnjë ndryshim i njëanshëm nuk mund të jetë i detyrueshëm për opozitën politike të vendit. Nëse Edi Rama ka vendosur të hedhë në erë zgjedhjet e ardhshme, ne do të bëjmë gjithçka që koston ta mbajë ai, personalisht, jo Shqipëria e shqiptarët.