E habitshme/ Ndodh në sallën e gjyqit: Zani Çaushi ‘ndërron’ mendje dhe nuk do të lirohet

Sot në Gjykatën e Korçës ka ndodhur një situatë e pazakontë.

Ish-kreu i Bandës së Vlorës, Zani Çaushi i cili është dënuar me burgim të përjetshëm, është tërhequr papritur nga kërkesa që kishte bërë për lirim me kusht.

Ndërkohë teksa është paraqitur para ‘togave të zeza’ ai ka deklaruar se është tërhequr nga kjo kërkesë.

Më pas çështja është pushuar automatikisht nga gjykata.

Ende nuk dihet se çfarë e ka bërë “kapobandon” e Vlorës që të ndryshojë mendim për lirinë e tij dhe vazhdojë të qëndrojë përjetë në burg.

I njohur si kreu i Bandës së Çoles dhe njeriu që komandonte Vlorën në vitin 1997, Caushi prej vitesh vuan dënimin në burgun e sigurisë së lartë në Drenovë, ndërsa pak ditë më parë i është drejtuar Gjykatës së Korçës për të kërkuar lirinë.

Deri tani, dy seanca gjyqësore ishin zhvilluar në Gjykatën e Korçës dhe më 17 korrik ishte caktuar seanca e radhës për të shqyrtuar kërkesën e Çaushit.

Çështja po gjykohej nga gjyqtari i çështjes, Selajdin Pysqyli.

Duke konsideruar se ka vuajtur mbi 25 vite burg nga dënimi me burgim të përjetshëm, se ka dy fëmijë të mitur për të rritur dhe se është rehabilituar në burg, Caushi i ishte drejtuar Gjykatës me kerkesen per lirinë me kusht.