Një ditë pasi qeveria e ka bërë me detyrim vendosjen e maskave në ambientet e mbyllura, duket se ndër të parët që kanë nxituar për të zbatuar këtë rregull është kryeministri Edi Rama.
Në seancën plenare që po zhvillohet aktualisht në Kuvend, Rama i bëri thirrje deputetëve që ta mbajnë maskën.
Teksa po mbante fjalim nga foltorja, në drejtim të kryeministrit u afrua deputetja Rudina Hajdari e cila i dhuroi në mënyrë të papritur një maskë.
Rama u shpreh se e ka një të tillë, por gjestin e Hajdarit e mori si një flamur paqeje mes tyre.
“I dashur Halit vëre maskën. Hajdari vëre maskën.Maskën maskën… maska është tanimë e detyrueshme në ambientet e mbyllura dhe jo e domosdoshme në ambientet e hapura. Përfitoj të sqaroj ata që më kritikojnë kur dal në rrugë dhe jam pa maskë. Në mjedise të hapura mjafton ruajtja e distancës dhe mos-kontaktimi me shtrëngim duarsh i të tjerëve për të qenë i mbrojtur. Ndërsa në mjediset e mbyllura me vendim zyrtar të MSh, maska është e detyrueshme dhe Kuvendi duhet të japë shembullin e vetë, gjë që zonja Hajdari nuk po e bën vetë, ndoshta për mungesë maske. (Hajdari ngrihet dhe i jep maskë Ramës). Unë e kam zonja Hajdari, por kur flitet nuk ka nevojë se jemi në distancë. Flamur paqeje ky…”,-u shpreh Rama gjatë fjalës së tij.
