Të gjithë e mbajmë mend Mimoza Hafizin, ish-deputeten e Partisë Socialiste dhe pedagogen, e cila themeloi lëvizjen politike ‘Libra’ së bashku me Ben Blushin.
Mirëpo plani nuk vajti ashtu si e kishin menduar dhe më pas dy aleatët nuk e vazhduan rrugën e tyre.
Mesa duket planet kanë shkuar ndryshe për Mimoza Hafizin.
Së fundmi ajo ka vendosur të shpallë kandidaturën për rektore të UT.
Lajmin e ka bërë të ditur vetë Hafizi nëpërmjet një reagimi në rrjetet sociale.
Ndër të tjera shton se e ka ndërmarrë shpejt këtë vendim për të shmangur përjashtimin nga gara.
Ajo thotë se vendimi i saj është një formë rezistence ndaj asaj që e quan ‘thikë pas shpine’ të pushtetit ndaj botës akademike. Hafizi flet edhe për një klan që ‘lidh e zgjidh’ prej njëzet vitesh fatet e Universiteti i Tiranës
REAGIMI I PLOTE I MIMOZA HAFIZIT
Pas vendimit të beftë të ministres së arsimit për hapjen e fushatës zgjedhore në universitete, mbrëmë depozitova kandidaturën për Rektore të Universitetit të Tiranës.
Hapja e fushatës zgjedhore në situatën e emergjencës shëndetësore që po kalon vendi, e po kështu dhe universitetet, është një nga aktet e paskrupullta të kësaj qeverie.
Shumë pedagogë e kanë quajtur ‘thikë pas shpine’ ndaj nesh, botës akademike. Por kjo është vetëm thika e rradhës, që mjedisi ynë pëson nga politika. Zgjedhjet në datën 30 korrik, me studentët larg dhe me pedagogë në periudhë pushimesh, mund të kenë vetëm nje qëllim: shmangien e trupës zgjedhore nga procesi. Zgjedhjet në mungesë të nje fushate normale komunikimesh, diskutimesh e debatesh, do të lenë gjatë shijen e hidhur të një procesi të parregullt. Vendimi i papritur i ministres duket se i shkon përshtat shmangies së kandidaturave konkuruese, përderisa krijon mundësinë që procesi i kandidimit të mbyllet po aq papritur sa dhe vendimi i saj.
Por, a duhet ulur koka? A duhet lenë prapë Universiteti i Tiranës nën influencën e të njëjtit klan, që ‘lidh e zgjidh’ prej njëzet vitesh fatet e tij, sipas interesave abuzive dhe meskine të një grupi njerëzish mediokër? Nje klan që ka ‘lidhur nyje’ aspiratën dhe frymëmarrjen e bashkësisë më të madhe intelektuale që ka Shqipëria, në konflike pa sens e pa fund. Një klan që i ka zvjedhur pedagogët me universitetin e tyre.
Unë vendosa të bëj rezistencën time. Vendimi im qe i shpejtë, për të shmangur përjashtimin nga gara, por i menduar gjatë dhe i frymëzuar nga shumë kolegë të nderuar, të cilët janë aty, në universitet, por veç e veç ndjehen të pafuqishëm përballë së keqes që po na ve tëposhtë. Bashkë besoj se e mundim këtë të keqe!
