Qëlloi me breshëri ndaj kushëririt të deputetit të PS, arrestohet në Shkodër autori i dyshuar (EMRI)

Mëngjesin e djeshëm një atentat tronditi Shkodrën, ku u qëllua me armë zjarri në drejtim të Fatjon Harushës, kushëririt të deputetit të PS Luan Harusha.

Ngjarja ndodhi në fshatin Vukatanë, ku 30-vjeçari ishte duke lëvizur me makinë, në momentin që u qëllua në drejtim të tij nga dy persona, njëri prej tyre u raportua se ishte femër dhe mbante veshur një bluzë të bardhë.

Ndërkohë policia njofton sot se është identifikuar dhe arrestuar autori i dyshuar.

Ai është Gjekson Pusi 33 vjeç, banues në Lagjen “Mark Lula” Shkodër, i cili ka thyer masën e sigurisë “Arrest në shtëpi”.

NJOFTIMI ZYRTAR I POLICISE

Ndalohet autori i dyshuar i ngjarjes së ndodhur dje, me datë 29.06.2020, në fshatin Vukatanë, Shkodër.

Nga strukturat e DVP Shkodër, në vijim të hetimeve intensive për zbardhjen e ngjarjes së ndodhur ditën e djeshme, u bë identifikimi dhe ndalimi i autorit të dyshuar, shtetasit Gj. P. 33 vjeç, banues në Lagjen “Mark Lula” Shkodër, i cili ka thyer masën e sigurisë “Arrest në shtëpi”.

Ky shtetas u ndalua pasi dyshohet se në orën 12:30, datë 29.06.2020, në fshatin Vukatanë, ka qëlluar me armë zjarri në drejtim të automjetit në pronësi të DPSHTRR, që drejtohej nga shtetasi F. H., 30 vjeç, banues në Dobraç, Shkodër.

Vijojnë hetimet e mëtejshme për zbardhjen e plotë të kësaj ngjarjeje.

Materialet i kaluan Prokurorisë së Rrethit Gjyqësor Shkodër.