“Nuk fillojmë më datë 15 qershor” Transporti Publik i vendosur për të mos nisur punën

Ditën e sotme Shoqata e Transportit Publik ka lajmëruar se nuk do të rifillojë puna më 15 qershor.

Pas disa protestave që ata kanë ndërrmarë ditët e fundit, me anë të një deklarate për mediat kanë thënë se pa u plotësuar kushtet nuk do të rinisë aktiviteti i tyre.

“Është e pamundur të respektohet protokolli’ tha shoqata, ndërsa listoi edhe kushtet. Shoqata si pikë të parë kërkon që transporti të jetë falas për udhëtarët gjatë pandemisë, por të subvencionohen nga shteti.

Gjithashtu ata kërkojnë që subvencionim nga shteti për vendet bosh në mjete për shkak të pandemisë. Nëse kjo pikë nuk plotësohet, atëherë ata kërkojnë që 30% e kapacitetit që mbetet bosh të subvencionohet nga shteti. Por prapë sipas tyre është e pamundur që të ketë distancim fizik edhe në 70% të kapacitetit.

Me planin e qeverisë për rifillimin e punës me 70% të kapacitetit ata kërkojnë heqjen e akcizës dhe taksave për karburantin, heqjen e TVSH-së së transportit gjatë vitit 2020 dhe në vitin 2021 TVSH-ja për transportin të shkojë 6%.

‘Kemi pasur takime dhe premtime dhe nuk besojmë se për dy ditë do të ketë ndryshim shumë të madh’ deklaruan përfaqësuesit gjatë fjalës së tyre.