Çfarë po ndodh që në mëngjes ? Policia dhe IKMT ‘zbarkojnë’ në bregdet, nis aksioni

Mëngjesin e sotëm dhjetra forca policie kanë zbarkuar gjatë vijës bregdetare në mbështetje të IKMT.

Mësohet se aty do të nisë një aksion për pastrimin e bregdetit nga ndërtimet pa leje.

Sipas njoftimit zyrtar të Policisë së Shtetit thuhet se: “IKMT në bashkëpunim me Policinë e Shtetit që prej orëve të para të mëngjesit të sotëm kanë nisur një aksion për goditjen e ndërtimeve pa leje, në vijën bregdetare në Velipojë, Shkodër dhe në Karaburun, në Vlorë”.

Gjithashtu sipas informacioneve në aksion janë angazhuar dhjetëra forca të IKMT dhe Policisë, të mbështetura nga mjete për shembjen e godinave në plazhe.

Krahas prishjes së ndërtimeve pa leje në këto zona, do të ketë procedim dhe ndëshkim me gjobë për subjektet në shkelje.

“Paralelisht, IKMT dhe Policia e Shtetit vijon punën për evidentimin dhe parandalimin e ndotjes mjedisore në lumenjtë e vijat ujore si dhe ndëshkimin e çdo kundërvajtësi, për prerjen e pyjeve apo dëmtime të tjera mjedisore, dhe njëkohësisht fton çdo qytetar e media të denoncojë shkeljet në numrin 112 ose përmes Komisariatit Dixhital”- bën me dije Ministria e Brendshme.