Duket se transporti publik urban në Shqipëri nuk do të rinisë punën më 15 qershor.
Kjo do të ndodhë në rast se nuk plotësohen 4 kushte që operatorët përkatës kanë vënë.
Ky vendim u mor një ditë pas protestës së zhvilluar para Ministrisë së Infrastrukturës.
Ndërkohë ditën e sotme, Shoqata Kombëtare e Transportit Qytetas, Ndërqytetas dhe Rrethqytetas të Udhëtarëve, si dhe Shoqata Urbane dhe Interurbane Veri, në një letër drejtuar kryeministrit Rama, ministres të Financave, Anila Denaj, ministres së Infrastrukturës Balluku dhe ministrit Shalsi kërkojnë edhe një herë plotësimin e 4 kërkesave që nga heqja e akcizës, TVSH-së, si dhe rimbursim për reduktim të kapacitetit dhe kategorive që udhëtojnë falas.
Ata pretendojnë se puna nuk do të rifillojë nëse këto kërkesa nuk plotësohen.
Operatorët e transportit publik dhe përfaqësuesit e Shoqatës së Transportit nesër do të zhvillojnë një tjetër protestë dhe paralajmërojnë përshkallëzim deri sa kërkesat financiare të plotësohen.
Nisja e punës sipas tyre me kapacitet të reduktuar 70% dhe me çmimet aktuale të biletave do të çonte sektorin drejt falimentimit.
LETRA E PLOTË
Përfaqësitë e shoqatave të transportit publik janë duke ndjekur me shqetësim situatën alarmante të krijuar nga COVID-19. Pa dyshim që qeveria shqiptare po përballet me vështirësi në këto momente delikate, por ju bëjmë të ditur se situata e transportit në Shqipëri, më saktë shoqëritë tregtare të cilat operojnë janë të fundit ende të mbyllura dhe si pasojë në kolaps ekonomik.
Bazuar në informacionin e marrë në rrugë jozyrtare, i cili thotë për rifillimin e shërbimit më datë 15 Qershor, në pritje të zyrtarizmit të dy prej kërkesave të premtuara nga Kryeministri, ne po ju përsërisim edhe një herë kërkesat tona ekonomike të panegociueshme, për të mundësuar rifillimin e shërbimit:
1.Heqjen e akcizës dhe taksave për blerjen e karburantit nga shoqëritë e transportit publik (njësoj siç është për industrinë e peshkut).
- Zbritjen e TVSH-së në shitje nga 20% në 0% për vitin 2020 dhe rikthimin e saj në nivelet e turizmit 6%, pasi edhe transporti është një nga hallkat thelbësore të zhvillimit të tij.
3.Rimbursimin e kapacitetit të munguar si arsye e protokollit të sigurisë.
4.Rimbursimin e kategorive, të cilat përfitojnë shërbimin falas në burim, në respekt të ligjit nr.37, datë 10.04.2014.
