Drejtori i policisë Ardi Veliu është takuar sot me Zaida Çobo, nënën e djalit që e rrahën policët 1 muaj më parë dhe për të cilën ai publikoi një video pak ditë më parë në Komisionin e Sigurisë.
Duke publikuar një foto nga ky takim, ku Veliu thotë se i ka shprehur ndjesë zonjës Çobo, më tej thekson se në asnjë moment nuk ka dashur që të justifikojë veprimin e dhunshëm të policit, që tashmë është i pezulluar.
“Sot u takuam me zonjën Zaida Çobo, e cila me të drejtë u ndje e lënduar nga komenti im që mori edhe shumë kritika publike.
Dëshiroja që ndjesën time publike t’ia bëja zonjës personalisht dhe më vjen mirë për mirëkuptimin e saj.
Përfitoj nga rasti ta përsëris edhe njëherë që jam i keqardhur për komentin tim dhe shpresoj që të jetë kuptuar nga të gjithë që ato fjalë nuk kishin qëllim fare të justifikonin policin (i cili është pezulluar menjëherë pas ngjarjes).
Po ashtu nuk më ka shkuar kurrë mendja të lëndoj zonjën apo familjen e saj me atë koment. Ndjesë edhe njëherë!” – u shpreh Drejtor Veliu pas bisedës.
