Nuk ka pushim për PD/ Basha sot në aksion, ja çfarë pritet të ndodhë

Duket se opozita nuk do të ketë pushim as të dielën.

Pas marrëveshjes për Reformën Zgjedhore, Partia Demokratike do të jetë sërish në aksion.

Mësohet se sot lideri demokrat Lulzim Basha ka thirrur në mbledhje kryesinë e PD.

Takimi do të mbahet në orën 11:00 në selinë blu, dhe pritet që Basha të informojë anëtarët mbi procesin e negociatave dhe arritjen e marrëveshjes.

Dy ditë pasi Këshilli Politik arriti një marrëveshje me 12 pika për Reformën Zgjedhore, kryesia pritet të miratojë ngritjen e një Grupi Ekspertësh për plotësimin e kuadrit ligjor për zbatimin e marrëveshjes.

Kjo mbledhje do të konsiderohet formale pasi dhe grupi i ekspertëve që pretendohet të ngrihet ka nisur nga puna prej kohësh, për shkak se është pjesë e këshillit politik.

Kujtojmë se nga marrëveshja e arritur, në zgjedhjet e ardhshme do të aplikohet identifikimi biometrik i zgjedhësve, një kërkesë kjo e demokratëve, që sipas tyre do të parandalojë një prej manipulimeve në zgjedhje, atë të votimeve fiktive.