OFL ‘shigjeton’ dy të dënuar në Tiranë e Kavajë, kush janë ‘të fortët’ që duhet të deklarojnë pasurinë

Ditën e sotme OFL ka vijuar punën duke i dërguar formularin e deklarimit të pasurisë 3 të dënuarve në Tiranë dhe 1 në Kavajë.

Kështu, sipas njoftimit zyrtar personat nënë shënjestër janë: Ylli Murati, i dënuar për vjedhje me armë.

Blendi Harasani, i dënuar për trafik droge si dhe Emiliano Tasi për vjedhje me dhunë.

Ky i fundit është arrestuar edhe për vrasjen e Enton Nikajt në Linzë, ngjarje kjo e ndodhur në vitin 2015.

Gjithashtu në Kavajë formulari i shkoi Spartak Kazazit, të dënuar për vrasje me paramendim dhe armëmbajtje pa leje.

NJOFTIMI ZYRTAR I OFL

Vijon pa ndërprerë Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020.

Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:

– Y. M., banues në Tiranë, i dënuar për veprën penale “Vjedhja me armë, e kryer në bashkëpunim”;

– S. K., banues në Kavajë, i dënuar për veprat penale “Vrasja me paramendim, e kryer në bashkëpunim” dhe “Armëmbajtja pa leje”;

– B. H., banues në Tiranë, i dënuar për veprën penale “Prodhimi dhe shitja e narkotikëve”;

– E. T., banues në Tiranë, i dënuar për veprën penale “Vjedhja me dhunë”;

Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.

OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.

OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.