Pas deklaratës së drejtorit të Përgjithshëm të Policisë Ardi Veliu në lidhje me nënën e 15-vjeçarit të dhunuar nga efektivët, ka ardhur dhe reagimi i kryeministrit Edi Rama.
I pyetur nga gazetarët konferencën e sotme nëse ai do të shkarkojë Veliun, kryeministri u shpreh se këtë cështje e konsideron të mbyllur, duke i vënë kështu në njëfarë mënyre ‘vulën’ qëndrimit të tij në detyrë.
Mirëpo nga ana tjetër Rama u shpreh se numri një i Policisë së Shtetit ka gabuar me veprimin që ka kryer.
“Më lejoni ta sqaroj që drejtori i Policisë për të cilin kam konsideratat më të larta për integritetin, profesionalizmin dhe rezultatet e aritura, në këtë rast ka gabuar, ka gabuar. E them pa asnjë rezervë, ka gabuar. Por jam i prirur t’i besoj ndjesës së tij publike se sa të gjithë moralistëve të mexhelisit të këtij vendi. Nuk ishte një përpjekje për të justifikuar dhunën sepse punonjësi i policisë është pezulluar menjëherë dhe është çuar në hetim menjëherë. Por është keqshpjeguar për të thënë ok, por dhe familja ka përgjegjësinë e vet. Çështja për mua është e mbyllur, ata që predikojnë më shumë moral dhe ligjësi morale, kam fatin t’i njoh siç kam fatin të njoh dhe drejtorin. Midis atyre dhe drejtorit unë zgjedh drejtorin, më vjen keq”, deklaroi Rama.
