“Ky kryeministër nuk ikën nga pushteti” Thirrja e fortë e Maliqit: Ramën e largojnë vetëm këto dy mënyra

Ditën e sotme deputeti i opozitës së re Lefter Maliqi ka dalë në një deklaratë të shkurtër përpara gazetarëve duke hedhur akuza të forta në drejtim të kryeministrit Rama.

Ai ka thënë se kreu i qeverisë është peng i krimit dhe i korrupsionit dhe se ka mbjellë Shqipërinë me drogë.

Sipas Maliqit ka vetëm dy mënyra për të larguar Ramën, me revoltë popullore ose ndërhyrjen e ndërkombëtarëve.

“Shqiptarët u bënë tre vjet e më shumë pas tepsisë dhe timonit që shikojnë vetëm tym të zi, varfëri dhe pasiguri, krim dhe korrupsion galopant, kapje të institucioneve dhe zgjedhje moniste. I vetmi tym i bardhë është ndërhyrja e faktorit ndërkombëtar. Ka ardhur koha e një ngritje të madhe se pasiguria në vend është shumë e madhe, vetëm këto dy ditë kemi vrasje e tritol, përdhunime të turpshme.

Ky kryeministër nuk ikën nga pushteti me votë të lirë por vetëm me revoltë popullore dhe ndërhyrje të fortë ndërkombëtare. Është peng i krimit dhe korrupsionit, e ka mbjellur Shqipërinë me drogë. Ka dy rrugë për të dalë nga kjo krizë, është revolucioni demokratik që në vjeshtë duhet të shpërthejë ose ndërkombëtarët të lënë diplomacinë dhe të vendosin gishtin mbi njeriun që po pengon reformën zgjedhore, reformën në drejtësi, që njollosi këtë vend, po vret demokracinë dhe kthen diktaturën në Shqipëri,” deklaroi deputeti ndër të tjera.