Presidenti Ilir Meta deklaroi sot gjatë konferencës se i ka dërguar një platformë me 14 pika palëve politike, opozitës dhe qeverisë, ambasadorëve të huaj që me 8 prill por ende nuk ka marrë asnjë përgjigje.
Ndërkohë, menjëherë pas fjalëve të presidentit, ka ardhur dhe reagimi i Ramës, i cili shkruan se Presidenti nuk i ka dorëzuar asnjë dokument por shprehet se është gati të ulet në cdo moment e të flasë me të.
Madje Rama shton se është gati të bëjë të njëjtën gjë dhe me opozitën brenda e jashtë parlamentit si dhe me partnerët e Reformës në Drejtësi.
REAGIMI I PLOTE I KRYEMINISTRIT RAMA
“Presidenti nuk më ka dorëzuar asnjë platformë, por jam gati të ulem në çdo moment me të, me opozitën brenda/jashtëparlamentare e me partnerët e Reformës në Drejtësi, që t’i vëmë pikat mbi “i” të gjitha pikave të të gjitha palëve në shqip/anglisht, se teatri ra, iku e na la. Jemi në prag të miratimit të Planit të Veprimit për Negociatat në Këshillin Kombëtar të Integrimit, s’ka rast më të mirë që Presidenti, Opozita, Institucionet e Drejtësisë, Partnerët Ndërkombëtarë për Drejtësinë dhe Integrimin, të mblidhen URGJENT në një tryezë me karta të hapura.
Presidenti t’i lerë apelet natën për 20 burra e ditën për 11 pika! Opozita t’i lerë ultimatumet trupore e sharjet fëminore! Të dy bashkë ta lenë teatrin e mbledhjeve të komitetit të shpëtimit, se Shqipëria, parlamenti, qeveria, s’kanë kohë të luajnë “e ka kush e ka” dezhurnin“, shkruan Rama në Twitter.
