SPAK nis hetimin e tenderave në ISKDSH. Mësohet se ekspertët kanë sekuestruar dosjet e periudhës kur në drejtim ishte Vjollca Braho, por dhe në vitin pasi ajo u largua nga detyra
Struktura e posaçme antikorrupsion pas nisjes së procedimit për katër tenderat sekret, ka hapur dhe një tjetër hetim. Burimet kanë bërë të ditur se ekspertët kanë zbarkuar në zyrat e Fondit të Sigurimit të Detyrueshëm të Kujdesit Shëndetësor. Ende nuk është bërë e ditur se cili është shkaku i kësaj nisme. Por mësohet se janë sekuestruar material të disa viteve.
Bëhet fjalë për materialet që kanë të bëjnë me tenderat e zhvilluara prej këtij institucioni.
Verifikimet janë kërkuar të nisin që prej fillimit të vitit 2016 por edhe më tej. Edhe pse institucioni ka qenë pak ose aspak në vëmendje të medias, duket se dyshimet për abuzime janë bërë që SPAK të kërkojë dosjet e plota për të mbikëqyrur të gjitha hapat e ndjekur.
Pikërisht në këtë periudhë, për të cilën kërkohet të hetohet, në krye të këtij institucioni ka qenë Vjollca Braho. Ajo u emërua në fund të vitit 2015 kur ende ishte me Partinë për Drejtësi Integrim dhe Unitet të drejtuar nga Idrizi.
Por pas shkëputje të kësaj force nga Rama, Braho vazhdoi të qëndrojë në detyrë. Edhe pse drejtuesit e tjerë që Idrizi kishte në qeverinë Rama u larguan. Braho vazhdoi të mbajë detyra të larta dhe në janar të vitit 2019 ka kaluar në krye të ISHSH.
Megjithatë do të jenë hetimet ato që do të japin konkluzionet mbi dokumentet.
/RTV Ora/
