Shembja e teatrit, thirrja e Edmond Budinës: Sot u vendos diktatura

Pas shembjes së godinës së Teatrit Kombëtar ka reaguar ashpër regjisori Edmond Budina, pjesë e Aleancës për Mbrojtjen e Teatrit. Ai ka deklaruar se në Shqipëri është vendosur përfundimisht diktatura. Budina i ka bërë thirrje popullit të ngrihet dhe Presidentit Ilir Meta që të shpërndajë parlamentin.

“Sot është bërë një akt kriminal. Është dhunuar shteti i së drejtës. Për mendimin tim sot në Shqipëri është vendosur përfundimisht diktatura. Në kohë pandemie, shteti i krimit ndërhyn sot në Teatrin Kombëtar duke tërhequr zvarrë qytetarët e tij që po mbronin një pronë publike. Këtu është një bashkëpunim mafiozo-pushtetar, shteti i mafies që vjen edhe tërheq zvarrë artistë dhe intelektualë të këtij vendi, vjen i armatosur a thua që këtu ishin bandat kriminale, kur ata që mbushin xhepat me para dhe masakrojnë popullin shqiptar janë të lirë dhe mund të bëjnë çfarë të duan.

Ndërsa ne që mbrojmë pronën publike, ne arrestohemi. Shokët tanë janë masakruar, dhe kjo është një nga aktet më të turpshme që janë bërë në këtë vend. Ka pasur njerëz brenda kur kanë nisur shembjen. I bëj thirrje popullit shqiptar ta kuptojë në cilin diktaturë jeton, është momenti ku duhet të ngrihen të gjithë. I bë thirrje komunitetit europian që të reagojë. I bëj thirrje presidentit të shpërndajë parlamentin ilegjitim. E ka detyrim kundrejt popullit të vet sepse edhe akti i fundit u krye”, ka deklaruar regjizori Budina.