Kryeministri në detyrë i Kosovës Albin Kurti ka bërë të ditur se dyshon se mund të jetë prekur nga koronavirusi dhe është vetëizoluar në banesë.
Sipas tij një zyrtar i Ministrisë së Integrimeve Evropiane (MIE) ka pasur kontakt të ngushtë me një nga personat e dalë pozitiv në testin për COVID-19.
Kurti thekson se dhe ai vetë ka patur kontakt me të sikurse edhe punonjës të tjerë në MIE e ZKM, ndonëse gjithnjë duke respektuar rregullat për distancën fizike.
Por pavarësisht kësaj ai ka vendosur të vetëizolohet në pritje të rezultateve të testit, pasi njofton se i është marrë dhe tamponi.
REAGIMI I PLOTE I KRYEMINISTRIT ALBIN KURTI
“Sot është dita e parë kur nuk do të dal në punë në Kryeministri (ZKM). Një zyrtar i Ministrisë së Integrimeve Evropiane (MIE) ka pasur kontakt të ngushtë me një nga personat e dalur pozitiv në testin për COVID-19. Janë marrë mostrat dhe po presim rezultatin.
Unë kam pasur kontakt me të, sikurse edhe punonjës të tjerë në MIE e ZKM, ndonëse gjithnjë duke respektuar rregullat për distancën fizike. Nga sot jam në vetizolim në banesë gjersa të dalin rezultatet e testimit për zyrtarin nga MIE.
Do t’i kryejmë detyrat nga largësia me përkushtimin e njëjtë, do t’i marrim vendimet e duhura me përgjegjësinë e njëjtë”.
