Çfarë do të ndodhë me mbrëmjet e maturës? Ministrja Shahini jep lajmin e hidhur

Me anë të një video-mesazhi, Ministrja Besa Shahini ka dhënë sqarime në lidhje me procesin e rikthimit të maturantëve në klasat e mësimit.

Shahini theksoi edhe një element të rëndësishëm sa i përket rikthimit në shkollë më 18 maj të maturantëve, duke sqaruar se kthimi në bankat e shkollës nuk do të jetë detyrues, por me karakter konsultues për provimet e maturës.

“Kthimi në shkollë nuk është i detyrueshëm. Ne po i hapim shkollat për maturantët ekskluzivisht për shkak se ju keni kërkuar që të keni konsultime me mësuesit tuaj përpara se të bëni provimin e maturës. Ndaj, nëse ndiheni që mund të bëni provimin e maturës pa e bërë këtë konsultim, ju mund të qëndroni në shtëpi gjatë kësaj kohe, të punoni individualisht, por duhet të njoftoni drejtorin e shkollës para 11 majit, në mënyrë që të planifikojmë uljen e nxënësve nëpër klasa dhe distancimin social për ata që shkojnë në shkollë”, deklaroi Shahini.

Ndër të tjera Shahini dha edhe një lajm të keq për maturëntët, të cilët këtë vit nuk do mund të festojnë mbrëmjet e matyrës që kanë qenë traditë për disa vite më radhë.

“Për fat të keq, jo. Mbrëmjet e maturës nuk do të lejohen. Janë festa që nuk mundësojnë distancimin social mes nxënësve, kështu që sivjet ato duhet të anulohen dhe të gjejmë forma të tjera për të festuar”, tha ministrja e Arsimit.