Lajmi që bëri bujë ditë më parë në media ishte punësimi në UKT i dy gazetareve Mira Kazhani dhe Bieta Sulo.
Duhet thënë se ky fakt shkaktoi shumë reagim në opinionin publik, ku shumë persona u shprehën të pakënaqur me mënyrën e punësimeve në vend dhe mungesës së meritokracisë.
Por së fundmi në lidhje me këtë gjë ka folur dhe kryetari i Bashkisë Tiranë Erion Veliaj ku duket se i ka mbrojtur hapur të dyja gazetaret.
Në programin “Real Story” me Sokol Ballën, ai ka thënë se nga kjo skemë nuk sheh asgjë të keqe, pasi e njëjta gjë ndodh dhe në SHBA apo në vende të tjera ku institucionet kanë nevojë për specialistë.
“Përsa i përket një kompanie, siç është UKT-ja, e cila është një nga kompanitë më të mëdhaja në qytet, ndoshta pas OSHEE, e cila ka nevojë gjithmonë për të marrë këshilltarë, specialistë mediash, konsulentë, për të marrë audit, për të marrë ekspertë kredie. Pra më të mirët që ka tregu, kjo është një gjë që ndodh tipikisht. Kolegët e zotit Lela në Britani, kolegët e tij në boston, punojnë rregullisht për kryetarët e bashkisë. Kështu që një kompani e qytetit merr eksperiencë dhe kërkon nga specialistë të medias, për mënyrën sesi do të komunikojë reforma të caktuara, për mua ka rëndësi bilanci.”, deklaroi Veliaj ndër të tjera.
