Vrasja e dy vëllezërve në Durrës, ja çfarë vendosi gjykata për autorët e dyshuar

Ditën e sotme Gjykata e Durrësit ka dhënë masën e sigurisë “arrest me burg” për autorët e dyshuar të vrasjes së dy vëllezërve Besmir dhe Viktor Haxhia.

Seanca ndaj dy të pandehurve Altin Ndoci dhe bashkëpunëtorin e tij  22-vjeçarin me inicale K.A, zhvillua nën masat e rrepta të sigurisë.

Mësohet se Prokuroria ka kërkuar “arrest me burg” për të dy.

Kanë qenë tabulatet telefonike, por edhe bashkëpunimi i 22-vjeçarit me policinë zbardhën dy ngjarjet e rënda kriminale që tronditën Durrësin në harkun e 2 muajve, ngjarje këto që ndodhën për prishjen e pazareve të drogës.

Kujtojmë se dy vëllezërit Haxhia u ekzekutuan pasditen e 29 prillit brenda makinës së tyre “Voklsëagen”, me 55 plumba.

Besmir dhe Viktor Haxhia u vranë tek parku i tregut të makinave në Durrësit, aty ku kishin edhe një biznes të tyre.

Në një prononcim të shkurtër pas përfundimit të seancës, avokati i Altin Ndocit, Saimir Visha tha se klienti i tij është shokuar për këto akuza pasi nuk ka prova për krimin.

Ai deklaroi se Ndoci kishte lidhje familjare dhe shoqërore me viktimat, madje shkoi dhe në varrim.

“U zhvillua me masa të rrepta sigurie, bëhet fjalë për një ngjarje të rëndë. Në lidhje me mbrojtjen, ai shprehet se nuk e ka kryer, nuk u paraqit asnjë provë nga prokuroria, ndihet i shokuar se dy viktimat i ka pasur lidhje miqësore dhe familjare. Ka shkuar edhe në varrim edhe për të tretat, dhe ndihet i shokuar pse e vendos gishtin policia dhe të tjerat.

Nuk është autori i veprës penale. Gjykata nisur nga vepra e rëndë përcaktoi arrest me burg. Kam kërkuar që të ketë një provë, është e tmerrshme që të caktosh arrest me burg pa asnjë provë. Prova për Altin Ndocin nuk ka”, u shpreh Visha.