LIGJET E BIZNESIT
Afro 20 miliardë lekë, ose rreth 220 milionë euro, parashikohet të shpërndahen për pensionistët në formën e bonusit mujor gjatë vitit 2027. Duke nisur nga janari, masa e bonusit do të jetë dy herë më e lartë krahasuar me atë që përfitojnë pensionistët gjatë vitit 2026.
Skema parashikon nivele të ndryshme përfitimi, në varësi të kategorisë së pensionit dhe kufirit maksimal të të ardhurave mujore. Konkretisht, pensionistët që përfitojnë pension të plotë urban dhe që marrin deri në 40 mijë lekë në muaj do të përfitojnë një bonus prej 3,600 lekësh çdo muaj. Për pensionistët e fshatit, bonusi do të jetë 2,000 lekë në muaj, për ata që kanë pension deri në 18 mijë lekë. Ndërsa pensionistët me pension të pjesshëm urban, me të ardhura deri në 22 mijë lekë, do të marrin 1,600 lekë në muaj. Në kategorinë e pensioneve familjare, përfitimi do të jetë 1,400 lekë në muaj për ata që nuk kalojnë pragun prej 18 mijë lekësh. Ndërkohë, pensionistët e invaliditetit, me pension deri në 30 mijë lekë, do të përfitojnë 1,200 lekë në muaj. Përfituesit që tejkalojnë kufijtë e përcaktuar për secilën kategori nuk do të përfitojnë nga bonusi mujor.
4 miliardë lekë për indeksimin e pensioneve
Përveç bonusit mujor, për vitin 2027 parashikohet edhe një fond prej 4 miliardë lekësh për indeksimin e pensioneve. Ky proces pritet të nisë në muajin prill, tre muaj më herët nga sa ishte parashikuar. Përmes dy mekanizmave, bonusit mujor dhe indeksimit, synohet rritja e të ardhurave të pensionistëve dhe përmirësimi i mbështetjes financiare për kategoritë e ndryshme. Në këtë mënyrë, viti 2027 parashikohet të sjellë një rritje të mbështetjes financiare për pensionistët, përmes një bonusi të diferencuar sipas llojit të pensionit dhe një procesi të përshpejtuar indeksimi.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
