LIGJET E BIZNESIT
Huamarrja në lekë vijon të ofrohet me interesa relativisht të ulëta, ndërsa kreditë në euro për bizneset po shtrenjtohen. Të dhënat e fundit të Bankës së Shqipërisë tregojnë se diferenca mes kostos së financimit në dy monedhat është ngushtuar, duke e bërë gjithnjë e më të vogël avantazhin e huamarrjes në lekë.
Sipas raportit të fundit të politikës monetare të Bankës së Shqipërisë, interesi mesatar për kreditë e bizneseve në monedhën vendase arriti në 6.5% gjatë tremujorit të tretë të vitit, nga 6.3% në dy tremujorët e parë. Megjithatë, krahasuar me të njëjtën periudhë të një viti më parë, norma rezulton rreth 0.2 pikë përqindje më e ulët. Rritja e interesave është më e theksuar te kreditë me vlerë mbi 35 milionë lekë. Për këtë kategori, norma mesatare u ngjit në 7%, nga 6.1% në gjysmën e parë të vitit. Ndërkohë, kreditë me vlera më të vogla vijojnë të përfitojnë nga interesa më të ulëta.
Një panoramë më e favorshme paraqitet për individët që financohen në lekë. Interesi mesatar për kreditë hipotekare zbriti në 3.7% në muajin e fundit, nga 3.9% në fillim të vitit. Në të kundërt, kreditë konsumatore vijojnë të kenë një kosto më të lartë, me interesa mesatare prej 9.1%, pranë niveleve më të larta të dy viteve të fundit. Në kahun tjetër, financimi në euro për bizneset po bëhet më i kushtueshëm. Norma mesatare e interesit arriti në 6.4% në tremujorin e tretë, nga 6% në gjysmën e parë të vitit. Krahasuar me një vit më parë, interesi ka mbetur në të njëjtin nivel.
Për individët që marrin kredi hipotekare në euro, zhvillimet janë disi më pozitive. Norma mesatare shënoi një ulje të lehtë, duke zbritur në 5.1%, nga 5.2% më parë. Këto zhvillime kanë ngushtuar diferencën mes kostos së huamarrjes për bizneset në dy monedhat. Interesi mesatar për kreditë në lekë është vetëm 0.3 pikë përqindje më i lartë se ai për kreditë në euro, duke treguar një afrim të ndjeshëm të normave.
Në vlerësimin e Bankës së Shqipërisë, normat e interesit për kreditë në lekë mbeten përgjithësisht në nivele të ulëta, duke mbështetur kushtet e financimit të ekonomisë. Megjithatë, shtrenjtimi i kredive në euro për bizneset tregon se zgjedhja e monedhës së huamarrjes po bëhet gjithnjë e më e rëndësishme për kostot financiare të kompanive.
